Үндэсний их баяр наадмыг угтан нийслэлийн Нийтийн тээврийн бодлогын газраас баярын өдрүүдийн бэлтгэл ажлыг ханган, иргэдийг тав тухтай зорчуулах зорилгоор ийнхүү үйлчилгээний хүртээмжийг нэмэгдүүлэн ажиллаж байгаа юм. Наадмын өдрүүдэд хот доторх болон Хүй долоон худаг чиглэлийн тусгай маршрутууд бүрэн хэрэгжиж эхлэх юм.
Наадмын өдрүүд буюу энэ сарын 10-аас 12-ны өдрүүдэд 139 чиглэлд 959 автобус иргэдэд тасралтгүй үйлчлэх юм. Мөн Хүй долоон худаг руу зорчих наадамчдад зориулан Хүй7:1 буюу "Төв цэнгэлдэх-Хүй 7 худаг", Хүй7:2 буюу "МУБИС-Хүй 7 худаг" чиглэлийн автобуснууд иргэдэд үнэ төлбөргүйгээр үйлчилгээ үзүүлж, цагийн хуваарийнхаа дагуу иргэдийг тээвэрлэх юм.
