Австралийн Сидней хотын алдарт Bondi Beach орчимд орон нутгийн цагаар Ням гарагийн орой олныг хамарсан буудлага гарч, олон хүн амь үрэгдэн, 60 гаруй хүн шархадсан ноцтой хэрэг гарлаа.
Цагдаагийн эх сурвалжийн мэдээлснээр, уг халдлага олон нийтийн арга хэмжээ үргэлжилж байх үеэр оройн 18:47 цагийн орчимд эхэлсэн байна. Гэнэт буун дуу тасралтгүй сонсогдож, иргэд айж сандарсан байдалтай зугтсан талаар гэрчүүд мэдээлжээ.
Урьдчилсан байдлаар 12 хүн амь үрэгдсэн, 60 гаруй хүн шархадан эмнэлэгт хүргэгдсэн бөгөөд заримынх нь биеийн байдал хүнд байгаа аж.
Хэрэгт холбогдсон хоёр этгээдийг баривчилж, нэг этгээдийг цагдаа нарын зэвсэг хэрэглэсэн ажиллагааны үеэр саатуулсан гэж мэдээлэв. Одоогоор хэрэг гарсан бүсийг бүрэн хааж, тэсрэх бодис болон бусад аюул занал байгаа эсэхийг шалгаж байна.
Албаныхан халдлагын сэдэл, зохион байгуулалттай эсэхийг тогтоохоор мөрдөн шалгах ажиллагаа явуулж байгаа бөгөөд уг үйл явдал нь олон нийтийг чиглэсэн санаатай халдлага байх магадлалтай гэж үзэж байна.
Австралийн Ерөнхий сайд уг явдлыг “аймшигтай, сэтгэл өвтгөм хэрэг” хэмээн тодорхойлж, хохирогчдын ар гэрт эмгэнэл илэрхийлсэн байна. Мөн олон нийтийг тайван байж, албан ёсны эх сурвалжаас мэдээлэл авахыг уриалжээ.
Одоогоор мөрдөн шалгах ажиллагаа үргэлжилж байгаа бөгөөд хохирлын тоо, хэргийн дэлгэрэнгүй мэдээлэл цаашид нэмэгдэн тодорхой болох аж.
Эх сурвалж: Reuters, ABC news Australia
