“Ард нийтийн санал асуулга” хөдөлгөөнөөс ирэх гуравдугаар сарын 1-ний өдөр Сүхбаатарын талбайд “БИД ИТГЭХГҮЙ БАЙНА” цуглаан зохион байгуулахаа мэдэгдлээ.
Тус хөдөлгөөнөөс мэдээлснээр, УИХ болон Засгийн газрын үйл ажиллагаа Монгол Улсын Үндсэн хууль зөрчсөн гэж үзэж байгаа бөгөөд энэ үндэслэлээр УИХ-д итгэл үзүүлэх эсэх асуудлаар ард нийтийн санал асуулга явуулах шаардлагатай хэмээн байр сууриа илэрхийлжээ.
Тэд дараах үндэслэлүүдийг дурдсан байна. Үүнд:
• 126 гишүүнээс 71 нь Үндсэн хууль зөрчсөнийг Үндсэн хуулийн цэц тогтоосон,
• 126 гишүүнээс 1 гишүүн ял шийтгэлтэй, 34 гишүүн яллагдагчаар татагдан шалгагдаж байгаа гэх мэдээлэл,
• Нийгэм, эдийн засгийн тулгамдсан асуудлуудад хариуцлагагүй хандсан зэрэг нь УИХ-д хариуцлага тооцож, тараах үндэслэл болж байна гэж үзэж буйгаа илэрхийлжээ.
Мөн тэд Монгол Улсын Үндсэн хуулийн 11, 19 дүгээр зүйлд заасан төрийн үүрэг, хариуцлагыг хэрэгжүүлэхгүй байна хэмээн шүүмжилж, Үндсэн хуулийн зарчмаа баримтлахыг шаардсан байна.
Хөдөлгөөний зүгээс “Монгол Улсын эх оронч иргэн бүр Үндсэн хуулийнхаа эрхэм зорилгын дор нэгдэх”-ийг уриалж, гуравдугаар сарын 1-ний цуглаанд оролцохдоо төрийн далбаа болон Үндсэн хуулиа авч ирэхийг мөн уриалжээ.
